ପୁରୀ,୧୩/୦୬: ତିନି ରଥରେ ଚଉଦ ନାହାକା ବୁଲି ପ୍ରଥମ ଭୂଇଁ ଉଠାଯାଇଛି । ଚାରିନାହାକାର ଚତୁଃପାଶ୍ୱର୍ରେ ବୁଲିଲା ଚଉଦନାହାକା । ପ୍ରଥମେ ତିନି ରଥର ଦଣ୍ଡା ଉପରେ ଖଦିଓରା କାଠ(ନଡ଼ିଆ କାଠର ଗଡ) ଖଞ୍ଜାଗଲା । ଖଦିଓରାରେ ହୋଇଥିବା ବିନ୍ଧରେ ଚଉଦନାହାକା ରଖି ରଥ ଚତୁଃପାଶ୍ୱର୍ରେ ବୁଲାଗଲା । ପରେ ସାଇତା ଯାଇଥିବା ପ୍ରଥମ ଭୂଇଁକୁ ରଥରେ ଉଠାଗଲା । ଏପଟେ ଖଳାରେ ଦ୍ୱିତୀୟ ଭୂଇଁର ଫ୍ରେମ୍ ପଡ଼ିଯାଇଛି । ଶୁକ୍ରବାର ଦ୍ୱିତୀୟ ଭୂଇଁ ରଥକୁ ଉଠାଯିବ ବୋଲି ନିର୍ମାଣକାରୀ କହିଛନ୍ତି ।
ଚାରିନାହାକା ଓ ଛଅ କାଠକୁ ଦୃଷ୍ଟିଦେଇ ଚଉଦନାହାକା ବୁଲିଥିଲା। ଚଉଦନାହାକାର ସାଲ ସବୁକୁ ଖଦିଓରାର ବିନ୍ଧରେ ଭୁଞ୍ଜାଗଲା । ଖଦି ଓରା ହେଉଛି ନଡ଼ିଆ କାଠର ଗଡ଼ । ଗୋଟିଏ ଖଦି ଓରାରେ ଦୁଇଟି ବିନ୍ଧ ହୋଇଥିଲା । ଚଉଦନାହାକା ବୁଲିବା ପରେ ପ୍ରଥମ ଭୂଇଁ କାଠ ଖଞ୍ଜାହେଲା । ପ୍ରଥମ ଭୂଇଁ ଛଅ କାଠ ଚାରି ପାଶ୍ୱର୍ରେ ପାଖୁଡା ଏବଂ ଛିଆଣ ଲାଗି ଏହି ପାଖୁଡ଼ା ଗୁଡ଼ିକୁ ଧରି ରଖିବା ପାଇଁ ଭୂଇଁ ଖମ୍ବୀ ସଂଯୋଗ ହେଲା ।
ସେହିପରି ୨ୟ ଭୂଇଁ ଫ୍ରେମ୍ ପଡ଼ି ଖୋଲାଯିବା ପରେ ରଥରେ ସଂଯୋଗ ହେବ । ଶୁକ୍ରବାର ରଥର ଦ୍ୱିତୀୟ ଭୂଇଁ ଉଠାଯିବ । ନନ୍ଦିଘୋଷ ରଥର ମୁଖ୍ୟ ବିଶ୍ୱକର୍ମା ବିଜୟ କୁମାର ମହାପାତ୍ର, ତାଳଧ୍ୱଜ ରଥର ମୁଖ୍ୟ ବିଶ୍ୱକର୍ମା ନରସିଂହ ମହାପାତ୍ର ଓ ଦେବୀ ରଥର ମୁଖ୍ୟ ବିଶ୍ୱକର୍ମା ନାରାୟଣ ମହାରଣାଙ୍କ ନିର୍ଦ୍ଦେଶ ଅନୁଯାଇ ଭୋଇସେବକମାନେ କାଠ ସବୁକୁ ଖଞ୍ଜିଥିଲେ । ଏଥିସହ ତାଳଧ୍ୱଜ ରଥରେ କତରା କାଠ ଲଗାଯାଇଛି । ରୁପକାରମାନେ ବିଭିନ୍ନ ରଥାଂଶରେ ଖୋଦେଇ କାର୍ଯ୍ୟରେ ଲିପ୍ତ । ବିଶ୍ୱକର୍ମାଙ୍କ କାମକୁ ତାଳ ଦେଇ ଓଝା ସେବକମାନେ ଲୁହା ସାମଗ୍ରୀ ତିଆରୁଛନ୍ତି । ଶୁକ୍ରବାର ରଥ ପ୍ରସ୍ତୁତିରେ ଦରଜୀ ସେବକମାନେ ଯୋଗ ଦେବେ ବୋଲି ସୂଚନା ରହିଛି ।
