ମୁମ୍ବାଇ,୧୩/୦୬: ବଲିଉଡ଼ ଜଗତରୁ ଏକ ଦୁଃଖଦ ଖବର ସାମ୍ନାକୁ ଆସିଛି । ଅଭିନେତ୍ରୀ କରିସ୍ମା କପୁରଙ୍କ ପୂର୍ବତନ ସ୍ୱାମୀ ସଞ୍ଜୟ କପୁରଙ୍କର ଦେହାନ୍ତ ହୋଇଛି । ମାତ୍ର ୫୩ ବର୍ଷ ବୟସରେ ସଞ୍ଜୟଙ୍କର ନିଧନ ହୋଇଥିବା ଜଣାପଡ଼ିଛି । ପୋଲୋ ଖେଳିବା ବେଳେ ତାଙ୍କର ହୃଦଘାତ ହୋଇଥିବା ଜଣାପଡିଛି । ୨୦୦୩ରେ କରିସ୍ମା କପୁରଙ୍କୁ ବିବାହ କରିଥିଲେ ସଞ୍ଜୟ ।
୫୩ ବର୍ଷୀୟ ସଞ୍ଜୟ କପୁରଙ୍କର ହୃଦଘାତରେ ପରଲୋକ ହୋଇଥିବା ଜଣାପଡିଛି । ଇଂଲଣ୍ଡର ଗାର୍ଡ୍ସ ପୋଲୋ କ୍ଲବରେ ତାଙ୍କର ଦେହାନ୍ତ ହୋଇଛି । ପୋଲୋ ଖେଳିବା ସମୟରେ ତାଙ୍କୁ ହାର୍ଟ ଆଟାକ୍ ଆସିଥିବା କୁହାଯାଉଛି । ଖେଳିବା ସମୟରେ ସେ ଅସୁସ୍ଥ ଅନୁଭବ କରି ତଳେ ପଡିଯାଇଥିଲା । ତୁରନ୍ତ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେତେବେଳକୁ ତାଙ୍କର ଦେହାନ୍ତ ହୋଇସାରିଥିଲା । ଗୁରୁବାର ଅହମ୍ମଦାବାଦରେ ହୋଇଥିବା ଭୟାନକ ପ୍ଲେନ କ୍ରାସ୍କୁ ନେଇ ଦୁଃଖ ପ୍ରକାଶ କରିଥିଲେ ସଞ୍ଜୟ କୁପର । ସେ ତାଙ୍କ ଏକ୍ସ ଆକାଉଣ୍ଟରେ କହିଥିଲେ, ''ଏୟାରଇଣ୍ଡିଆ ବିମାନ ଦୁର୍ଘଟଣା ବହୁତ ଭୟାନକ । ସମସ୍ତ ମୃତକଙ୍କୁ ମୋର ଶ୍ରଦ୍ଧାଞ୍ଜଳି ତାଙ୍କ ପରିବାରକୁ ଗଭୀର ସମବେଦନା ।'' ହେଲେ କିଏ ଜାଣିଥିଲା ବିମାନ ଦୁର୍ଘଟଣାର କିଛି ଘଣ୍ଟା ପରେ ସଞ୍ଜୟ କପୁରଙ୍କର ବିୟୋଗ ହେବ ବୋଲି ।
ସଞ୍ଜୟ କପୁର ଜଣେ ବ୍ୟବସାୟୀ । ୨୦୦୩ରେ ସେ ଅଭିନେତ୍ରୀ କରିସ୍ମା କପୁରଙ୍କୁ ବିବାହ କରିଥିଲେ । କରିସ୍ମାଙ୍କ ସହିତ ତାଙ୍କର ବିବାହ ବେଶୀ ଦିନ ରହିନଥିଲା । ୨୦୧୬ରେ ସେମାନଙ୍କର ଛାଡପତ୍ର ହୋଇଥିଲା । କରିସ୍ମାଙ୍କୁ ଛାଡପତ୍ର ଦେବା ପରେ ସେ ପ୍ରିୟା ସଚଦେବଙ୍କୁ ବିବାହ କରିଥିଲେ । ତାଙ୍କର ଦୁଇଟି ସନ୍ତାନ ରହିଛି । ସୋନା କୋମଷ୍ଟାରର ଅଧ୍ୟକ୍ଷ ଥିଲେ ସଞ୍ଜୟ କପୁର ।
