ଝରୀଗାଁ, ୧୦/୦୬ : ନବରଙ୍ଗପୁର ଜିଲ୍ଲା ଝରୀଗାଁ ବ୍ଲକର ଚକଲାପଦାର ପଞ୍ଚାୟତ କଂଗ୍ରା ସେକ୍ସନରୁ ବନ ବିଭାଗ ୪୦ଟି ଜୀବନ୍ତ କଇଁଛ ଉଦ୍ଧାର କରିଛି। ଉମରକୋଟ ବ୍ଲକ ପୂଜାରୀ ଗୁଡା UV-9ର ସୁରଜିତ ମଣ୍ଡଳ (୩୧ ବର୍ଷ) ବାଇକ୍ ଯୋଗେ କଇଁଛ ନେଇ ଯାଉଥିବା ବେଳେ ବନ ବିଭାଗ ଟିମ୍ ହାତରେ ଧରା ପଡ଼ିଛନ୍ତି। 

ରେଞ୍ଜର ଗୋବିନ୍ଦ ଚନ୍ଦ୍ର ନାୟକଙ୍କ ସୂଚନାନୁଯାୟୀ, କଳାହାଣ୍ଡି ଜିଲ୍ଲାର ଲୋଡୁଗାଁ ଗ୍ରାମରୁ କଇଁଛ ଚାଲାଣ ହେଉଥିବା ନେଇ ବିଶେଷ ସୂତ୍ରରୁ ଖବର ପାଇ ସୋମବାର ରାତି ୮ ଟାରେ ଫରେଷ୍ଟର ଅମିତ କୁମାର ଦାସ, ବିଷମ ପୂଜାରୀ, ଗଣପତି ଭତରା ସହ ୱାଇଲ୍ଡ ଲାଇଫ୍ ସ୍କ୍ଵାଡ୍ ଚଢାଉ କରିଥିଲେ। ଏହି ସମୟରେ ଉମରକୋଟ ବ୍ଲକ ପୂଜାରୀ ଗୁଡା UV-9ର ସୁରଜିତ ମଣ୍ଡଳ ବାଇକ୍ ଯୋଗେ ଜୀବନ୍ତ କଇଁଛ ନେଇ ଯାଉଥିବା ବେଳେ ବନ ବିଭାଗ ହାବୁଡ଼ରେ ପଡ଼ିଥିଲେ। ଯାଞ୍ଚ ବେଳେ ତାଙ୍କ ନିକଟରୁ ୪୦ଟି ବିରଳ କଇଁଛ ଜବତ ହୋଇଥିଲା। କଇଁଛ ତସ୍କରୀ ଅଭିଯୋଗରେ ବନ ବିଭାଗ ସୁରଜିତଙ୍କୁ ଗିରଫ କରିଥିଲା। ଆଜି ତାଙ୍କୁ କୋର୍ଟ ଚାଲାଣ କରାଯାଇଥିବା ବେଳ, ଜବତ କଇଁଛ ଗୁଡ଼ିକୁ ଝରୀଗାଁ ସ୍ଥିତ ସେଣ୍ଟ୍ରାଲ ନର୍ସରୀ ଠାରେ ରଖାଯାଇଛି।

କଇଁଛ ଗୁଡ଼ିକୁ ଉମରକୋଟ ଅଞ୍ଚଳରେ ବିକ୍ରି ପାଇଁ ନେଉଥିବା ଅଭିଯୁକ୍ତ ସ୍ଵୀକାର କରିଛନ୍ତି। କଳାହାଣ୍ଡିରୁ ଲକ୍ଷାଧିକ ଟଙ୍କାର କଇଁଛ ଚାଲାଣ ହେଉଥିବା ନେଇ ଅଭିଯୋଗ ଆସିଥିବା ବେଳେ ଏହା ପଛରେ କୌଣସି ବଡ଼ ରାକେଟ୍ କାମ କରୁଥିବା ସନ୍ଦେହ ବଢିଛି। ତୃଣମୂଳ ସ୍ତରରେ ତଦନ୍ତ ପ୍ରକ୍ରିୟା ଜାରି ରଖିଥିବା ରେଞ୍ଜର ଗୋବିନ୍ଦ ନାୟକ କହିଛନ୍ତି।