ଭୁବନେଶ୍ୱର,୨୩/୦୬: ଆଉ ଲାଇଫ୍ରେ କେବେ ବି ତୁ ମତେ ଦେଖିବାକୁ ପାଇବୁନି । ସବୁଦିନ ପାଇଁ ଏ ଦୁନିଆ ଛାଡି ଦେଉଛି । ତୁ ତୋ ନୂଆ ଲାଇଫ୍ ପାର୍ଟନର ସହ ଖୁସିରେ ରହ । ମିସ୍ ୟୁ ଲୋ ଗେଲୁ ... ଇନ୍ଷ୍ଟାଗ୍ରାମ୍ରେ ଏଭଳି ବିରହଭରା ଷ୍ଟାଟସ୍ ରଖି ଜଣେ ଯୁବକ ଜୀବନ ହାରିଛନ୍ତି । ରାଜଧାନୀ ଉପକଣ୍ଠ ସୁନ୍ଦରପଦା ଅଞ୍ଚଳର ବିରିବନ୍ଧ ଗାଁରୁ ଏଭଳି ଦୃଶ୍ୟ ସାମ୍ନାକୁ ଆସିଛି । ମୃତକଜଣକ ହେଲେ, ପ୍ରିୟବ୍ରତ ପ୍ରଧାନ । ସେ ଡିଜେ ଅପରେଟ୍ର ଥିଲେ ।
ସୂଚନା ମୁତାବକ, ସେ ଉକ୍ତ ଅଞ୍ଚଳର ଜଣେ ଦଶମ ଶ୍ରେଣୀ ଛାତ୍ରୀଙ୍କୁ ଭଲ ପାଉଥିଲେ । ବାରମ୍ବାର ପ୍ରେମ ନିବେଦନ କରିବା ପରେ ଉଭୟଙ୍କ ଭିତରେ ପ୍ରେମ ସମ୍ପର୍କ ଆରମ୍ଭ ହେଲା । ଛାତ୍ରୀଜଣକ କିଛି ମାସ ପରେ ତାଙ୍କ କ୍ଲାସ୍ର ଆଉ ଜଣଙ୍କୁ ପ୍ରେମ କରିବାକୁ ଲାଗିଲେ । ଏହା ଜାଣିବା ପରେ ପ୍ରିୟବ୍ରତ ଦୁଃଖରେ ଭାଙ୍ଗି ପଡିଥିଲେ । ପ୍ରିୟବ୍ରତ ଅନେକ ଚେଷ୍ଟା କରିବା ସତ୍ତେ୍ୱ ଛାତ୍ରୀଙ୍କ ନିକଟତର ହୋଇପାରିଲେନି । ଗତକାଲି ରାତିରେ ସେ ନିଜ ବେକରେ ଗାମୁଛା ଗୁଡ଼ାଇ ଫ୍ୟାନ୍ରେ ଝୁଲିପଡ଼ିଲେ । ଏୟାରଫିଲ୍ଡ ଥାନା ପୁଲିସ ଘଟଣାସ୍ଥଳରେ ପହଞ୍ଚି ପ୍ରିୟବ୍ରତଙ୍କ ଝୁଲନ୍ତା ମୃତଦେହକୁ ଉଦ୍ଧାର କରିଥିଲା । କ୍ୟାପିଟାଲ ହସ୍ପିଟାଲରେ ଶବ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି । ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି ।
